बाल कहानी : --- // नहला ऊपर दहला //

राम नगर म दू झन गौटिया रहत रिहिन । दूनों नहला ऊपर दहला मारे म माहिर रिहिन । ओ मन हर काम - बुता म चार गुना फायदा उठाय बर सोचय । एखर सेती दूनों झन बड़ धनवान अउ जमीन वाला घला रिहिन । दूनों झन के परवार मस्त रहत रिहिन फेर , एक दूसर ल नीचा देखाय बर कभु कोई कसर नइ छोड़त रिहिन । एकझन गौटिया के नांव चतुर सिंह अउ दूसर के नांव ठाकुर सिंह । एक दिन बिहनिया ले चतुर सिंह गौटिया ह ठाकुर सिंह के घर पहुँचिस त ठाकुर सिंह ह बड़ आदर ले किहिस , " आज बिहनिया ले कइसे पधारेवं गौटिया , हाल - चाल तो सब ठीक - ठाक हे गो ? अतका बेर तो तयं मन्दिर जाथस । " चतुर सिंह ह अपन मुड़ ल झटकारत किहिस -- " अरे छोटे गौटिया ! मोर तो सब ठन - ठन गोपाल हे । जब कभु धंधा के गोठ होथे त भगवान के दरसन घला दूसरा दर्जा म चले जथे । " अच्छा बताववं , काय के सौदा ले के आये हो ? ठाकुर सिंह ह गंभीर हो के पूछिस । चतुर गौटिया ह बताइस कि ओखर करा शहर के बुड़ती मुहाटी म आखरी छोर मेर जेन शिव मन्दिर हे , ओखरे पाछू म एकठन जमीन हे । जेन ह भारी सस्ता हे । कौडी़ के भाव म दे दुहू । चतुर गौटिया के मन म खटकिस । ओ मने - मन सोचिस कि जमीन म जरुर कुछू गड़बड़ हे या फेर कुछू लोचा हे , तभे कौडी़ के भाव म दे के गोठ करत हे ! ओ हा हाँसत किहिस , " तयं तो बिगन चार गुना फायदा के कोई सौदा नइ करस गो गौटिया चल बता कते जमीन हरे ।" शिव मंदिर के डेरी हात के , चतुर गौटिया ह किहिस । ठाकुर सिंह ह किहिस - अरे ! उही राख के ढेर हे तेन ह ...... सब समझ गेव गौटिया , तुमन ओला कौडी़ के भाव म नहीं , फूटी कौडी़ के भाव म बिसाय होबे ... चल , तँय बिहनिया बेरा आये हस त लेन - देन के गोठ घला कर लेथन । चतुर गौटिया ह ओ जमीन ल ठाकुर सिंह करा बेच दिस , सिरिफ आठ कोरी फूट म । काबरकि ओहा ओला एक कोरी फूट म ले रिहिस । ओ हा सोचत रिहिस कि भारी जोर दरहा फंसाएव ठाकुर सिंह ल । अब ओ हा फेकवाही ओ राख ल , तब पता चलही कि जमीन ओला कतका महंगा परिस । चतुर गौटिया भारी खुश हो के अपन घर पहूँचिस । आते साठ ओ अपन घरवाली ल बताइस , आज तो मय ठाकुर सिंह ल अच्छा चूना लगा के आवत हव । राख के कुढ़हा ल बेच देव । ओ ये गोठ ल सब झन ल बताइस । सांझ तक पूरा नगर के लोगन जान डरिन कि चतुर सिंह सच म भारी चतुर हे । रात के ठाकुर सिंह ह घला ये गोठ ल सुनिस । ओ मने मन मुसकाइस । ठाकुर सिंह घला सवा सेर रिहिस । ओ दुनिया देखे रिहिस । अब ठाकुर सिंह ह दिन - रात इही सोचत रहय कि नहला तो फेक दे हे अब मोला दहला के जरुरत हे । काय करे , चिन्ता - फिकर म खाना - पीना , उठना - बइठना , इहा तक कि रात के सुतना घला मुसकुल होगे रहय । ठाकुर सिंह के हालत देख के गौटनिन ल फिकर होवत रिहिस । आठ दिन के बाद रात किन गौटनिन ह पलंग म ढलगे गौटिया के गोड़ - हात म तेल चुपरत पूछिस कि का बात के चिन्ता करत रहिथो जेन अतका हलाकान होगेव । महुं ल तो बताव कुछू रद्दा मिल जाही । गौटिया कहिथे - " चतुर गौटिया के जमीन ह बहुतेच सस्ता म मिले हे फेर वो जमीन ह राख अउ पूजा - पाठ के फूल - पान म पटाय हे । आज ओखर किमत कौडी़ के भाव म हे । उही राख के ढेर ल सफा करवाना हे । जेन दिन राख के ढेर सफा हो जही , उही दिन वो जमीन के भाव दस गुना बढ़ जही । अब सोचना ये हे कि कम लागत म वो जमीन के राख कइसे सफा होही ? " गौटनिन कहिथे - " तयं एखर चिन्ता झन कर । फोकट के आठ दिन ले हलाकान होवत हो - छोट कुन कहानी, सरी रात उसनिंदा । अभी रात भर सुतो मय बिहनिया तुमन ल एखर उपाय बताहुं । " गौटनिन जानत रिहिस कि नगर के जनता अंध - बिश्र्वासी हे चमत्कार ऊपर अटूट भरोसा - बिश्र्वास करथे । अच्छा गोठ तो ए हरे कि जमीन ह शिव मंदिर के पाछू म हे । कुछू अइसनेच चक्कर चलाना परही तब चतुर गौटिया के सब चतुराई घुसड़ जाही । बिहनिया उठते साठ गौटिया ह गौटनिन ल पूछिस - " कस ओ गौटनिन कुछू उपाय मिलिस का ? " " हाँ , मिलगे हे फेर थोकन खरचा लागही । मय जइसने कहत हव वइसनेच करवं " गौटनिन मही बिलोवत - बिलोवत किहिस । ठाकुर गौटिया ह हव कहिके चुपचाप घर ले बाहिर निकलगे । तीन दिन के बाद ठाकुर सिंह गौटिया ह अपन घर म शिव पूजा के आयोजन करिस । लोगन मन पूछत रिहिन कि हुदूप ले शिव पूजा काबर ? ठाकुर गौटिया ह गंभीर होके बताइस कि ओला रात के एकठन सपना आय रिहिस । भयानक बिचित्र सपना , सपना देखेव कि मोर आगु म सौहत शिव भोले बबा ह एकबात म तिरसुल अउ दूसर हात म डमरु धरे खड़े रिहिस । मोर आँखी चौंधिया गे । थोकनिक के बाद शिव बबा ह किहिस -- " तँय रोज मोर ऊपर पानी चढ़ाबे अउ आठ दिन के बाद शिव मंदिर के पाछू म जेन पूजा - पाठ के कचरा के ढेर ले दू बोरी राख लान के अपन घर के बारी म चारो मुड़ा छिड़क देबे तोर मन म जेन भी मनोकामना होही तेन ह समय आतेच पूरा हो जही । जा बेटा , काली सोमवार आय पनी चढ़ाना चालू कर देबे । " ठउका अतकेच बेर गौटनिन मोला उठा दिस । ठाकुर गौटिया अउ गौटनिन मंदिर के पाछू ले दू बोरी राख लान के अपन बारी के चारो मुड़ा छिड़क दिस । अइसनेहे अफवाह मन आज कल झटकुन फैल जथे । देखते देखत चार दिन म पूरा नगर के लोगन मन ल पता चलगे कि मंदिर के पाछू के राख के कचरा ल लान के...... । चार दिन म वो जमीन के जम्मो राख अउ कचरा ह साफ होगे । लोगन मन वो जमीन के अइसन सफाई कर दिन कि बहराय बटुराय छनछन ले दिखत रहाय । वो जमीन भारी सुग्घर होगे रिहिस । ठाकुर गौटिया अउ गौटनिन ह जा के देखिन त खुशी के मारे उछल - उछल के नाचे बर धर लिन । दूसर दिन तो गौटिया अउ गौटनिन बर कोई बड़खा तिहार ले घला बड़खा तिहार बरोबर लागत रहय । सांझकिन पीतल के गिलास अउ फूलकांस के माली म चाहा पीयत - पीयत गौटनिन ह ठिठोली करत किहिस - " कस गौटिया , मय अतका फायदा करवाएवं त चल गौटनिन ल कुछू बिसा के दे देथो कहिके तोर अंतस ह नइ कहत हे । " ठाकुर सिंह अपन मेछा ल अइठत किहिस - गौटनिन ! तँहु का सुरता करबे कहत अपन कुरता के खिसा ले एकठन नौलखा हार निकाल के गौटनिन के घेंच म बांध दिस अउ बोलिस अब बता , कइसे हे ? गौटनिन नौलखा हार ल पा के मने मन म बिक्कट खुश होगे । गौटिया कथे - अभी जात हंव चतुर गौटिया के हाल चाल पूछे बर ओखर घर । गौटनिन किहिस एक किलो मोतीचूर के लड्डू संग म लेवत जाहूं , जुच्छा दूनो हात ल हलात झन चल दुहूं सुरता करके । ठाकुर गौटिया ह सीधा चतुर सिंह के घर गिस । चतुर अपन घर के आगु म खटिया ऊपर उदास बइठे चोंगी पीयत रिहिस । " राम राम गौटिया ! ठाकुर सिंह ह हाथ जोड़के जोर से किहिस । चतुर गौटिया ह ठाकुर गौटिया ल देख के दूसर तनी मुंह कर लिस । अरे , भैया जी उदास काबर होवत हस धंधा म लाभ हानि चलत रहिथे । तँय सोचे होबे कि ए राख के टीला वाले जमीन ल ठाकुर सिंह के घेंच म ओरमा के मय वोला उल्लू बना देव । मोर भाई , ए धरती म एक ले बड़ के एक चतुर हे । फेर भाग के लिखाय ल कोन टार सकही । अब ए जमीन ले लाखों रुपिया कमाहु । इही खुशी म काली भंडारा हे । तँय गौटनिन संग जरुर आबे । चतुर सिंह ह तमक के किहिस - भं - डा - रा ? " हां भई भंडारा एखर सेती कि बिचारा नगरवासी मन कतका मेहनत कर के वो जमीन ल सुग्घर साफ करिन अउ मोला भारी लाभ पहुंचाइन त कम से कम वो मन ल भंडारा म हलवा -पुड़ी , बरा - भजिया , गरम - गरम जलेबी के भोजन तो कराहूं । ठाकुर सिंह गौटिया ह जय सियाराम कहत नहला ऊपर दहला ठोंक के घर ले बाहिर निकलगे । लक्ष्मीकांत वैष्णव " अबोध " न्यू चंगोराभाठा , रायपुर