छत्तीसगढिय़ा पत्रकार के सम्मान म छत्तीसगढिय़ा पत्रकार महासंघ मैदान म, मीडिया म काम करइया छत्तीसगढिय़ा मन बर पूरा ताकत के साथ खड़े रइही महासंघ....

रइपुर। छत्तीसगढ़ म छत्तीसगढिय़ा पत्रकार मन के सम्मान म छत्तीसगढिय़ा पत्रकार महासंघ मैदान म जोरशोर ले उतर गे हवय। छत्तीसगढिय़ा पत्रकार महासंघ के पहिली प्रदेश कार्यकारिणी के बइठका रइपुर मोतीबाग चौक के तीर  मार्डन कॉम्प्लेक्स स्थित कार्यालय म संपन्न होइस, ये मउका म  कार्यकारिणी के सबो पदाधिकारी मन संगरहे रिहस हे। बइठा के शुरुआती संबोधन छत्तीसगढिय़ा पत्रकार महासंघ के प्रदेश अध्यक्ष गजेंद्र रथ वर्मा ह करिस अउ किहिस कि लंबा समय ले एक भावना मन म रिहिस कि छत्तीसगढ़ के प्रादेशिक पत्रकार साथी मन के एक मंच हो जेमा अपन महतारी भाखा छत्तीसगढ़ी म विचार अउ संबोधन के आदान-प्रदान के साथ ही प्रादेशिक पत्रकारिता ल विश्वसनीयता के साथ आघू बढ़ाय जा सके, इही उद्देश्य ले आज छत्तीसगढिय़ा पत्रकार महासंघ के रूप म आकार लेवत हवय, वोमन हर महासंघ के विकास बर सबो कार्यकारिणी सदस्य मन ले विचार मांगिस अउ अनवरत छत्तीसगढिय़ा पत्रकार के हित म संगठन संचालित करे के विश्वास दिलाइस। बइठका म महासंघ के प्रदेश उपाध्यक्ष नवीन देवांगन व पुनीत सोनकर हर महतारी भाखा छत्तीसगढ़ी म पत्रकारिता के प्रतिमान ल पटल म रखिस अउ और कई तरह के समस्या के साथ ये क्रम ल संचालित करने के भाव प्रस्तुत करिस। महासंघ के प्रदेश कोषाध्यक्ष अशोक साहू अउ मुकेश टिकरिहा ह घलो महासंघ के संचालन बर अपन विचार व्यक्त करिस अउ आने वाला समय म एक मजबूत कार्य प्रणाली विकसित करेे के बात किहिस, महासंघ के प्रदेश विधिक अउ कानून मंत्री डॉक्टर ताराचंद चंद्राकर ह पत्रकारिता पोर्टल संचालन अउ समाचार पत्र- पत्रिका मन ल ले के केंद्र अउ राज्य सरकार के नियम कानून उपर बात रखिस अउ किहिस कि छत्तीसगढिय़ा पत्रकार महासंघ पूरा निष्ठा अउ वैधानिक तरीका ले पत्रकार मन के हित म निर्णय लिही, प्रदेश रिसर्च टीम के प्रमुख अनुराग शर्मा ह अपन अनुभव साझा करत आरटीआई के नियम कानून संबंधी जानकारी दिस अउ सरकार के विभिन्न विभाग में व्याप्त अव्यवस्था उपर पत्रकारिता के माध्यम ले सुधार लाय के बात किहिस, महासंघ के प्रदेश प्रवक्ता मनोज वर्मा ह अपन अनुभव साझा करिस अउ पत्रकार मन के हित म महासंघ के दायित्व ल लेके जानकारी दिस, छत्तीसगढ़ के पहिली प्रादेशिक अउ मातृभाषा के कैलेंडर बछर के संपादक और गीतकार पत्रकार ईश्वर साहू घलो ये बइठका म उपस्थित रिहिन, मातृभाषा के महत्ता अउ वर्तमान स्थिति ल लेके उहूं मन अपन बात रखिस नवा बछर म आने वाला वोकर कैलेंडर बछर 2025 बर छत्तीसगढिय़ा पत्रकार महासंघ ह वोला बधाई दिस अउ महतारी भाखा छत्तीसगढ़ी के संरक्षण अउ संवर्धन बर आघू रहिके जवाबदारी घलो छत्तीसगढिय़ा पत्रकार महासंघ ह लिस। बइठका म मुख्य रूप से कार्यकारिणी सदस्य अउ आरंग ले न्यूज़ 24 के पत्रकार तुकेश्वर टिक्कू लोधी प्रदेश महामंत्री के साथ ही दुरुग ले श्री सोनी, रइपुर लेे अब्बड़ झन पत्रकार साथी मन के उपस्थिति रहिस, सबो झन अपन बात रखिस अउ महासंघ के कार्यकारिणी  म अपन जवाबदारी बर आशान्वित करिन। ये बइठका के आयोजन छत्तीसगढिय़ा पत्रकार महासंघ के प्रदेश महासचिव अब्दुल शमीम अउ प्रदेश सचिव परितोष शर्मा के कुशल संचालन म संपन्न होइस। ये मउका म प्रदेश महासचिव अब्दुल शमीम ह संगठन निर्माण के शुरुआती विचार उपर चरचा करिस अउ ये बइठका ल संगठन के भविष्य बर पहिली ईंटा के संज्ञा दिस। प्रदेश सचिव परितोष शर्मा ह किहिस कि देर ले ही सही फेर ये एकजुटता एक बड़का जीत के  कोती इशारा हवय जउन जीत छत्तीसगढ़, छत्तीसगढ़ी और छत्तीसगढिय़ा के हक में होही। छत्तीसगढ़ म ये पहिली बार होवय हे कि आम छत्तीसगढिया पत्रकार अपन महतारी भाखा अउ अपन प्रदेश म अपन अधिकार बर एकजुट होय हवय, राज्य निर्माण के 25 बछर बाद आज छत्तीसगढ़ अपन भाषा संस्कृति अउ प्रतिमान बर दुनिया भर म पहिचाने जाथे अइसे म मीडिया म काम करइया छत्तीसगढिय़ा मन बर ये संगठन पूरा ताकत के साथ खड़े रइही अइसे उम्मीद जतावत संगठन के पहिली कार्यकारिणी बइठका संपन्न होइस।